Custom Search

Wednesday, September 30, 2009

ग़ज़ल



सपनीमा आउछ्यौ तिमी अनायासै घरि घरि
एकै छिन आंउदा पनि किन हेर्छयौ आँखा तरि
माया गर्नु पापै भए गरें एउटा महा पाप
सपनीमै ज्युछुं बरु आइदेउ तिमी घरि घरि
सुन्दर छ्यौ संयम पनि सपनीमा भेट्दा भने
देख्छु तिम्रो कलि रुप बिपनीमा घरि घरि
छैन माया भने भन फर्की हेर्नु छैन पनि
धिक्कारेर ज्युनु पर्ला जिन्दगीलाई सधै भरि !!

Sunday, September 27, 2009

माछापुच्छ्रे र धर्मं

अखवारको हेड्लाईन के छ थाहा छैन
हर्के कुर्लन्छ
(ल आयो हजुर आजको ताजा खबर ...............)
बुज्रुकहरू आतुर आतुर पत्रिका किन्छन
एक बुज्रुक समाचार सार सुनाउछन
सवै जना उनीप्रति ध्यानाक्रित गर्छन
कोहि हो मा हो मिलाउछन
प्रभाती सान्ध्य प्रहरको लालीत्यले माछापुच्छ्रे मुस्काउदै थियो
एक टुक्रा बादल उड्दै आयो र बिलायो पनि
"आफुंहरुले जे गरेपनि हुने अरुलाई यसो र त्यसो "
भड्किलो आवाज ले जमिन थर्क्यो
माछापुच्छ्रे मुख छोपेर लाज ढाक्दै थियो
तर थाहा थिएन , उसको सर्वाङ्ग नाङ्गो आकृती
मुख छोप्दैमा छोपिदैन भनेर
यौबन को उन्माद लिएर ठडिएको माछापुच्छ्रे
त्यहि उन्माद बोकेर झरेका अतृप्त बैंशालु नदिहरु
कतिको प्यास मेट्दैछन ?
कतिको तृष्णा पखाल्दैछन्?
एक बृद्ध लौराको सहारा ले सडक पार गर्दै हुन्छन
एक हुल मानिस नारा जुलुस सहित सडक भरि हुन्छन
हुलमुलमा बिचरा बृद्ध व्यक्ति आफ्नो लौरो गुमाउछन
माछापुच्छ्रे ठडिएकै छ ,उ पग्लिएकै छ
मानौ -ठडिनु उसको कर्तव्य हो ठडिदिन्छ
पग्लिनु उसको धर्म हो पग्लिदिन्छ
कसैले भोगोस या प्यास मेटोस
ऊसलाई के वास्ता
किनकि वास्ता गर्नु उसको धर्मै होइन
चासो लिनु उसको कर्मै होइन !!!

Friday, September 18, 2009

मेरो मन !

मेरो मन
स्वस्छन्द आकाशमा चरा जस्तै उड्न खोज्यो
चट्याङ्को झोक्काले पखेटा काट्यो
पखेटा काटिएपछि पनी त मेरो मनले यात्रा रोकेन
जमिनमा घस्री घस्री हिडिरह्यो
थाहा छैन मलाई उसको गंतब्य
थाहा छैन उसको लक्ष
के का लागी क्षितिजमा पुग्यो
र अहिले घिस्रदै छ ?
कतै लड़दै कतै चढ्दै बढिरह्यो यात्राकै निम्ति
खोला झैं बग्ने मन झरना झैं झर्यो
हिमाल झैं स्थिर मन पानी झैं बग्यो
आखिर मन न हो ,रोकेर कहाँ रोकिंदो रहेछ र ?
माया बनी कसैको प्रतिबिम्बमा खनियो
माया र मन उस्तै हुंदा रहेछन क्यारे
बग्दै जाने सकिदै जाने
आज ,मायाले खै कुन्नी के उपलव्धि पाएछ ?
मन झैं उड्न लागेछ
न कुनै बाधा छ न कुनै मोड़
रेखीय मोड़ सरल-बक्र
सुनें मायाले माया पायो रे
तर मनले ?
बिना लक्षमा हिडेको मन रोक्न खोंजे
बिना प्रप्तिमा रम्ने मन छेक्न खोंजे
तर
म त रित्तो रहेछु
मायाले पाएको माया संगै -मेरो मनको डोरी चुँडिएछ
म त मन बिहीन बनेछु
रित्तो केवल रित्तो !!!